Niċċelebraw l-Evanġelju tar-4 Ħadd tal-Għid

Preparazzjoni:
Ipprepara ħin u post għat-talb: xemgħa, Bibbja, silenzju.

---

Fl-isem tal-Missier u tal-Iben u tal-Ispirtu s-Santu.

Nidħol fil-presenza ta’ Alla li hu tajjeb:

Faħħru l-Mulej, għaliex hu tajjeb,
għax għal dejjem it-tjieba tiegħu!
Aħjar tistkenn fil-Mulej
milli tittama fil-bnedmin.
Aħjar tistkenn fil-Mulej
milli tittama fil-kbarat..

(Salm 117)

---

L-Evanġelju

Niftħu qalbna għall-Kelma t’Alla

Qari mill-Evanġelju skond San Ġwann

F’dak iż-żmien, Ġesù qal: “Jiena r-ragħaj it-tajjeb. Ir-ragħaj it-tajjeb jagħti ħajtu għan-nagħaġ tiegħu. Il-mikri, li mhuwiex ir-ragħaj, u li n-nagħaġ mhumiex tiegħu, jara l-lupu ġej, u jħalli n-nagħaġ u jaħrab; u l-lupu jaħtafhom u jxerridhom. Mikri hu, u ma jħabbilx rasu min-nagħaġ.

Jiena r-ragħaj it-tajjeb; jiena nagħraf in-nagħaġ tiegħi, u n-nagħaġ tiegħi jagħrfu lili, bħalma l-Missier jagħraf lili u jiena nagħraf lill-Missier; u għan-nagħaġ tiegħi nagħti ħajti. Għandi wkoll nagħaġ oħra, li mhumiex minn dan il-maqjel; lilhom ukoll jeħtieġ li niġbor, u huma jisimgħu leħni, u jkun hemm merħla waħda, ragħaj wieħed.

Għalhekk iħobbni l-Missier, għax jien nagħti ħajti, biex nerġa’ neħodha. Ħadd ma jeħodhieli, iżda jien nagħtiha minn rajja. Għandi setgħa li nagħtiha, u għandi s-setgħa li nerġa’ neħodha; din hi l-ordni li ħadt mingħand Missieri”.

(Ġwanni 10, 11-18)

---

Riflessjoni u talba:

i. Jiena r-ragħaj it-tajjeb. Ir-ragħaj it-tajjeb jagħti ħajtu …

Il-moda tinbidel.
Dak li jogħġobni illum jaf idejjaqni għada.
Iżda hemm sbuħija li tibqa’ tirxoxta.

Is-salib mistmerr li jumilja,
sar is-salib li jsebbaħ u jerfa’,
għax fuqu tela’ ir-ragħaj it-tajjeb/is-sabiħ (kalos),
li jagħti ħajtu għan-nagħaġ tiegħu;

għax fuq is-salib,
kull ġest huwa espressiv,
ix-xagħar imqanfed għal raġuni,

għax mhux bħall-mikri li ma jħabbilx rasu min-nagħaġ,
għax fiż-żmien iebes joħroġ għonqu għall-merħla,
u l-ilma jinbidel fl-inbid it-tajjeb (kalos– Ġwanni 2,10)
u f’kull ġest tiegħu jilma l-għemil it-tajjeb (kalos) tal-Missier

(Ġwanni 10,32.33)

Irrifletti:

• Ftakar f’xi ġest sabiħ, azzjoni tajba li għamilt din il-ġimgħa? X’għamlu ġest sabiħ? X’ħalla fik?
• Fejn tilma l-imħabba tal-Missier?

ii. Jiena r-ragħaj it-tajjeb; jiena nagħraf in-nagħaġ tiegħi, u n-nagħaġ tiegħi jagħrfu lili.

It-tajjeb u s-sabiħ ma ssibux fil-mera!
Quddiem il-mera, jekk timtela (bik innifsek) teħel,
u jekk taqta’ qalbek teħel ukoll.

It-tajjeb u s-sabiħ huwa dak li immarkat bl-imħabba,
Imħabba li tagħraf, tistagħġeb, tirrikonoxxi,
Imħabba li toħloq sensta’ appartenenza.

Il-kruha tinfirex meta nfittex li naħtaf, nikkontrolla, nuża u narmi.
Is-sbuħija tilma meta kull ġest magħmul b’mod personali, b’tenerezza,
iwassal għal ħbiberija, komunjoni, qsim tal-ġid.

Irrifletti

• Ieqaf fil-presenza ta’ Ġesù li jafek, jagħarfek, iħobbok, iqisek ta’ ġewwa.
• Min huma l-persuni  li  jagħtuk ħjiel ta’ dan l-għarfien sabiħ ta’ Ġesù? Li fil-presenza tagħhom fil-mod kif ikellmuk, tinduna li jafuk sew u jħobbuk b’mod personali; tinduna li qatt mhu ser jarmuk! Kif tista’ tikkomunika imħabba simili?

iii. Ħadd ma jeħodhieli (ħajti), iżda jien nagħtiha minn rajja.

Hemm libertà li teqirdek!
Hemm libertà li tirxuxtak!

Ħafna drabi l-ideal propost huwa li tkun liberu billi TAGĦŻEL.
Agħżel li trid .. l-aqwa li tagħżel.
Ħadd ma għandu jindaħallek x’tagħżel.
Ħalli lil kulħadd jagħżel li jrid.
L-aqwa li tagħżel!
U l-għada … ???

Ġesù ma jipproponix ideal ta’ libertà fl-astratt li meta mħaddem jeqirdek.
Ġesù jagħtina triq ta’ libertà li tidher stramba.
Il-punt tat-tluq mhix l-għażla iżda n-nuqqas ta’ għażla: li issib lilek innifsek maħbub.
Maħbub għal xejn b’xejn! Bla ma għażilt l-ebda ħaġa inti!
U xħin idduq is-sabiħ … it-tajjeb
tinbet fik il-libertà li tagħmel ġesti sbieħ, tajba,
ġesti fejn tagħti ħajtek;
mhux ġesti ħerġin mill-biża’: fejn qatt ma nintefa fil-ħajja, azzjonijiet difensivi.

F’Ġesù l-ubbidjenza lejn il-Missier (l-imħabba) u l-libertà li jagħti ħajtu mhux kontra xulxin.
Meta timxi din it-triq issib li ħajtek qiegħda kull darba tirxoxta,
għax kull ġest ikun mimli ħajja għax mimli bl-imħabba eterna t’Alla.

Irrifletti:

• Agħraf li inti maħbub/a! B’mod profond.
• Għal min qed tagħti ħajtek?

---

Nitolbu l-Missierna flimkien

Glorja lill-Missier u lill-Iben u lill-Ispirtu s-Santu,
Kif kien mill-bidu, issa u dejjem, għal dejjem ta’ dejjem.

Fl-Isem tal-Missier u tal-Iben u tal-Ispirtu s-Santu
Ammen

Ħajr lil Fr Jimmy Bonnici għar-riflessjoni.