![](https://marsaskalaparish.org/wp-content/uploads/2024/08/j1-1038x576.jpg)
Nitlaq jew nibqa’?
Niċċelebraw l-Evanġelju tal-21 Ħadd – B.
Fl-isem tal-Missier u tal-Iben u tal-Ispirtu s-Santu.
Ippruvaw u taraw kemm hu tajjeb il-Mulej.
L-Evanġelju
Niftħu qalbna għall-Kelma t’Alla
Qari mill-Evanġelju skont San Ġwann
F’dak iż-żmien, Ġesù tkellem fuq il-ħobż tal-ħajja. Ħafna dixxipli tiegħu, meta semgħuh, qalu: “Iebes dan il-kliem! Min jiflaħ jisimgħu?”. Ġesù ntebaħ waħdu li d-dixxipli tiegħu kienu qegħdin igergru fuq hekk, u qalilhom: “Dan il-kliem qiegħed ifixkilkom? Mela xi tgħidu kieku kellkom taraw lil Bin il-bniedem tiela’ fejn kien qabel? Hu l-Ispirtu li jagħti l-ħajja, il-ġisem ma jiswa għal xejn. Il-kliem li jiena għedtilkom huwa spirtu u ħajja. Iżda hemm xi wħud fostkom li ma jemmnux”. Għaliex Ġesù kien jaf sa mill-bidu min kienu dawk li ma emmnux u min kien dak li kellu jittradih. U ssokta jgħidilhom: “Kien għalhekk li jiena għedtilkom li ħadd ma jista’ jiġi għandi jekk il-Missier ma jagħtihx li jiġi”.
Minn dakinhar bosta mid-dixxipli tiegħu telquh u ma baqgħux imorru warajh. Imbagħad Ġesù qal lit-Tnax: “Tridux titilqu intom ukoll?”. Wieġbu Xmun Pietru: “Mulej, għand min immorru? Inti għandek il-kliem tal-ħajja ta’ dejjem, u aħna emminna u għarafna li inti l-Qaddis ta’ Alla”.
(Gw 6, 60-69)
Riflessjoni u talba:
i. “Iebes dan il-kliem! Min jiflaħ jisimgħu?”
Jiġi l-mument fejn niskopru bieb,
li jiftaħ fuq possibilitajiet li qatt ma immaġinajna,
li ma jħalliniex magħluqin fina nfusna u l-ideat li fassalna.
U nibnu ħajt biex nagħalquh!
Irrifletti:
- L-Evanġelju kif jiftħek għal realtà ġdida? Fejn għandek esperjenza ta’ reżistenza?
![](https://marsaskalaparish.org/wp-content/uploads/2021/08/j2-683x1024.jpg)
ii. “Hu l-Ispirtu li jagħti l-ħajja, il-ġisem ma jiswa għal xejn. Il-kliem li jiena għedtilkom huwa spirtu u ħajja.”
Dak li hu maħluq, waħdu, jibqa’ dgħajjef,
ma jiswa għal xejn.
Imma meta jinfetaħ għall-Ħallieq,
meta iħalli l-widna tagħmel xogħolha,
meta tħalli spazju fik għal Kelmtu,
għal dak li jixtieq jaqsam ħajtu miegħek,
Hemm tirċievi Spirtu u ħajja.
Irrifletti
- Liema sentenza mill-Evanġelju offrietlek sfida u mlietek bil-ħajja?
![](https://marsaskalaparish.org/wp-content/uploads/2021/08/j3-1024x683.jpg)
iii. “Tridux titilqu intom ukoll?”
Jiġi mument ta’ kriżi
li jlaqqgħek mal-libertà, don ta’Alla:
jew tagħżel li tingħalaq, li tabbanduna kollox,
jew tagħżel li tibqa’, li tintelaq (f’idejn), li tgħix,
li tieħu riskju, li tpoġġi l-għeruq fi Kristu,
li tinvesti ħajtek fuq dak li ma tistax tkejjel u taħkem:
li tagħti spazju għall-kelma “dejjem”,
għall-kelma “Alla” …
Irrifletti
- Ieqaf fuq il-kliem ta’ Pietru: “Mulej, għand min immorru? Inti għandek il-kliem tal-ħajja ta’ dejjem, u aħna emminna u għarafna li inti l-Qaddis ta’ Alla”.
Nitolbu l-Missierna flimkien
Glorja lill-Missier,
u lill-Iben,
u lill-Ispirtu s-Santu,
kif kien mill-bidu,
issa u dejjem,
jibqa’ għal dejjem,
ta’ dejjem,
Ammen.
Fl-Isem tal-Missier u tal-Iben u tal-Ispirtu s-Santu
Ammen
Ħajr lil Fr Jimmy Bonnici għar-riflessjoni.