pexels/shvets: I am wonderfully made.

Fl-Isem tal-Missier u tal-Iben u tal-Ispirtu s-Santu
 
Għajtu bil-ferħ lil Alla,
bnedmin tad-dinja kollha.

1. Niftħu qalbna għall-Kelma t’Alla   

F’dak iż-żmien, Ġesù qal lid-dixxipli tiegħu: “Jekk tħobbuni, ħarsu l-kmandamenti tiegħi. U jiena nitlob lill-Missier, u hu jagħtikom Difensur ieħor biex jibqa’ magħkom għal dejjem, l-Ispirtu tal-verità, li d-dinja ma tistax tirċevih, għax hija la tarah u lanqas tagħrfu. Iżda intom tagħrfuh, għaliex jgħammar magħkom, u huwa fikom. Ma nħallikomx iltiema. Nerġa’ niġi għandkom. Ftit ieħor, u d-dinja ma taranix aktar. Iżda intom għad tarawni, għax jiena ngħix, u intom ukoll għad tgħixu. F’dak il-jum intom tagħrfu li jiena f’Missieri, u intom fija u jiena fikom. Min iżomm il-kmandamenti tiegħi u jħarishom, dak hu li jħobbni; u min iħobb lili, iħobbu wkoll il-Missier, u jiena wkoll inħobbu u nurih lili nnifsi”. Ġwanni 14, 15-21.

pexels/emuse shutter: notes revealing the heart.

i. Jekk tħobbuni, ħarsu l-kmandamenti tiegħi.

Dak li hemm fil-qalb tal-artista
joħroġ fin-noti li tikkomponi jew iddoqq
fid-daqqiet fuq it-tila, il-kuluri li tagħżel

L-imħabba li hemm f’qalbek
toħroġ fl-għażliet żgħar li tagħmel kuljum
fl-għażliet kbar li juru fejn Alla qed f’ħajtek.

Imma n-noti li ddoqq, il-kuluri li tagħżel
jgħinuk terġa tidħol fil-ġewwieni tiegħek
u ssawwar imħabbtek.

Irrifletti:

• Fejn qed tesprimi l-imħabba li hemm f’qalbek?

pexels/iriser: which voice shapes your life?

ii. U jiena nitlob lill-Missier, u hu jagħtikom Difensur ieħor biex jibqa’ magħkom għal dejjem, l-Ispirtu tal-verità, li d-dinja ma tistax tirċevih, għax hija la tarah u lanqas tagħrfu.

Qed nirrealizza li anke jien ngħix bħad-dinja
ngħix minn vuċi waħda
tal-akkużatur li jġiegħlni naħseb
li “tajjeb jien, tajjeb kulħadd”
li jien inkun aħjar ladarba taqa’ int
li ħajti ngħixha fil-biża li ma niswiex
u naħtaf jew nirtira biex forsi niswa.

Imma fil-fatt hemm vuċi oħra –
dik tad-Difensur –
ta’ dak li jiġi ħdejja, li jitkellem favur tiegħi,
il-vuċi tal-verità
tal-memorja li jien niswa’ f’għajnejn Alla
il-vuċi tal-imħabba għalija li dehret fi Kristu Ġesù.
Nista’ nfassal ħajti fuq din il-memorja, fuq din il-vuċi.

Irrifletti:

• Liema vuċi l-aktar b’saħħitha bħalissa fik? Tal-akkużatur jew tal-Verità?

pexels/cottonbro: I will not leave you orphans.

iii. Ma nħallikomx iltiema. Nerġa’ niġi għandkom. Ftit ieħor, u d-dinja ma taranix aktar. Iżda intom għad tarawni, għax jiena ngħix, u intom ukoll għad tgħixu.

Xorta hemm biża fija li jien waħdi:
li nispiċċa waħdi,
li, fl-aħħar mill-aħħar,
ħadd ma jafek u
“ħadd ma jkun jafulek”.

Imma nħares ‘l quddiem
b’fiduċja fil-futur li jagħti l-Irxoxt:
“Ma nħallikomx iltiema.
nerġa niġi għandkok”.

Irrifletti:

• Oqgħod ftit mal-wegħda ta’ Ġesù: “Nerġa niġi għandkom”.

3. Missierna