ĦSIEB MINN TESSIE FARRUGIA

Għeżież,

Nhar il-Ħadd li għadda rajna kif Ġesù ma ġiex milqugħ min-nies li kien għex magħhom għal madwar tletin sena. 

Illum qed niltaqgħu ma’ Ġesù jibgħat lill-appostli tnejn tnejn biex ixandru l-kelma ta’ Alla u jwasslu lin-nies għall-indiema.

San Mark l-Evanġelista ma semmiex li t-tagħlim kien importanti għal Ġesù iżda semma x-Xandir tal-Kelma, il-fejqan tal-morda u s-setgħa fuq l-ispirti l-ħżiena. Ġesù ordnalhom lit-Tnax biex ma jieħdu xejn magħhom għall-vjaġġ, la ħobż, la ħorġa, lanqas flus fi ħżiemhom; imma li jilbsu l-qrieq u ma jxiddux żewġ ilbiesi. L-aktar essenzjali li huma kellhom bżonn kienet li jafdaw tassew f’Alla: għax Alla kien se jkun dejjem magħhom.

L-istruzzjonijiet li Ġesù ta lill-appostli jfakkruna fl-istruzzjonijiet li Alla ta lil-Lħud meta kien qed jeħlishom mill-jasar tal-Eġizzjani. Alla qalilhom kif għandhom jieklu l-ħaruf. Huwa riedhom jafdaw fih, iħallu l-Eġittu, jidħlu fid-deżert u jiġbru l-manna skont il-bżonn ta’ dak il-jum. Ġesù qal lit-Tnax biex ma jieħdux flus magħhom u biex jibqgħu fl-ewwel dar fejn jilqgħuhom. Dan seħħ biex huma ma jintilfux ifittxu l-kumdità jew joqgħodu għaddejjin minn dar għal oħra.  Huma għandhom jaħdmu bħal ħaddieħor u jgħixu fuq dak li huma jkunu jaqilgħu. Fi kliem ieħor għandhom jitħalltu mal-ħajja u jaqsmu fix-xogħol tan-nies. B’hekk, l-istess nies kienu jaċċettawhom aktar u aħjar fil-komunità fejn kienu jaqsmu l-ikel magħhom.

L-appostli kellhom jieħdu ħsieb lill-morda u jkeċċu bosta xjaten. Huma riedu jimxu ma’ ħaddieħor kif kien jagħmel Ġesu innifsu. Bħalu riedu jħennu u jilqgħu lil dawk li kienu mwarrba u emarġenati. L-Aħbar it-Tajba ta’ Ġesù kienet mibnija fuq erba’ pilastri fundamentali: ospitalità, komunjoni, qsim u aċċettazzjoni. Is-Saltna ta’ Alla tkun preżenti meta n-nies li jgħixu b’fidi, jagħżlu li jgħixu f’komunità biex jagħtu xhieda flimkien u biex juru li Alla huwa Missier u Omm kulħadd: permezz tiegħu aħna lkoll aħwa ta’ xulxin.

Ġesù ried li l-komunità tkun espressjoni tal-Patt, tas-Saltna, tal-imħabba ta’ Alla l-Missier li tagħmilna lkoll aħwa.

 

Talba: Mulej għin lil dawk kollha li jagħmlu parti mill-Knisja tiegħek biex jifhmu li l-missjoni tal-Knisja għandha tkun bħal ta’ sptar li tgħin biex tfejjaq il-feriti ta’ ħafna nies imweġġa’ u batuti. Ieqaf magħna u għinna nkunu strumenti f’idejk ħalli nkunu kapaċi b’ħajjitna nwasslu l-messaġġ li Int biss il-verità, il-vera mħabba, u inti dejjem lest biex tilqagħna fi ħdanek.

—————————— —

 

———————————