![](https://marsaskalaparish.org/wp-content/uploads/2024/08/unnamed-2024-08-31T122509.078-1038x576.jpg)
Mill-qalb!
Niċċelebraw l-Evanġelju tat-22 Ħadd – B.
Fl-isem tal-Missier u tal-Iben u tal-Ispirtu s-Santu.
Mulej, min jgħammar fid-dar tiegħek?
L-Evanġelju
Niftħu qalbna għall-Kelma t’Alla
Qari mill-Evanġelju skont San Mark
F’dak iż-żmien, il-Fariżej u xi wħud mill-kittieba li ġew minn Ġerusalemm inġabru ħdejn Ġesù, u raw li xi wħud mid-dixxipli tiegħu kienu qegħdin jieklu b’idejhom mhumiex indaf, jiġifieri mhumiex maħsulin. Għax il-Fariżej, u l-Lhud kollha, biex iħarsu t-tradizzjoni ta’ missirijiethom, ma jmissux ikel qabel ma jkunu ħaslu jdejhom sewwa; hekk ukoll wara li jerġgħu lura mis-suq, ma jiklux jekk ma jinħaslux; u għandhom bosta drawwiet oħra li baqgħu marbutin magħhom minn żmien għal ieħor, bħalma huma l-ħasil tat-tazzi u tal-buqari u tal-ktieli tal-bronż. Mela, il-Fariżej u l-kittieba staqsewh: “Dan l-għala d-dixxipli tiegħek ma jġibux ruħhom skont it-tradizzjoni ta’ missirijiethom, imma jieklu b’idejhom mhumiex indaf?”.
Iżda hu weġibhom: “Sewwa ħabbar Iżaija fuqkom, ja nies ta’ wiċċ b’ieħor, bħalma hu miktub: ‘Dan il-poplu bix-xufftejn biss jagħtini ġieħ, imma qalbhom hija ’l bogħod minni. Fiergħa hi l-qima li jagħtuni; jgħallmu duttrina li mhijiex għajr preċetti tal-bnedmin’. Hekk intom, twarrbu l-kmandamenti ta’ Alla biex tħaddnu t-tradizzjoni tal-bnedmin”.
Raġa’ sejjaħ in-nies lejh u qalilhom: “Isimgħuni, intom ilkoll, u ifhmuni! Ma hemm xejn minn barra li meta jidħol fi bniedem itebbgħu; imma dak li joħroġ minn ġol-bniedem, dak hu li jtabba’ lill-bniedem. Għax hu minn ġewwa, mill-qalb tal-bniedem, li joħorġu l-ħsibijiet il-ħżiena, żína, serq, qtil, adulterju, regħba, ħażen, qerq, libertinaġġ, għira, malafama, suppervja u bluha. Dal-ħażen kollu minn ġewwa joħroġ u jtabba’ lill-bniedem”.
(Mk 7:1-8,14-15,21-23)
Riflessjoni u talba:
i. Il-Fariżej u xi wħud mill-kittieba li ġew minn Ġerusalemm inġabru ħdejn Ġesù, u raw li xi wħud mid-dixxipli tiegħu kienu qegħdin jieklu b’idejhom mhumiex indaf, jiġifieri mhumiex maħsulin.
Ġew mill-belt
jgħaddu l-ħin tagħhom janalizzaw
lil nies li nofs il-ħin kienu jgħadduh fuq dgħajsa
jew bilqiegħda mal-art isewwu x-xibka:
“Dan kif m’għandhomx id-drawwiet tal-belt?”
Armi … lilhom u lill-Imgħallem li jżommhom miegħu!
Irrifletti:
- Fejn tiġġudika lin-nies mid-drawwiet li drajt bihom inti? Fejn mistieden tifhimhom aħjar?
ii. Fiergħa hi l-qima li jagħtuni; jgħallmu duttrina li mhijiex għajr preċetti tal-bnedmin’. Hekk intom, twarrbu l-kmandamenti ta’ Alla biex tħaddnu t-tradizzjoni tal-bnedmin”.
Kemm duttrini u tradizzjonijiet noħolqu biex ijassruna!
Possibbli l-mobile ilu għandek 3 snin? Meta ser tibdlu?
Kemm il-mejda differenti ser tagħmel għat-tieġ?
Rajthom l-offerti tal-Lidl u Schein? Possibbli ma xtrajt xejn?
Irridu niksru r-record … festa akbar, nar aktar, “bħalna ħadd!”.
Tal-Etjopja ġbarnielhom 20 sena ilu. Il-karti mhux preċiżi. Mhux posthom hawn. Barra.
Dawk għaddew minn falliment. Però bħalissa mhux eżatti fir-relazzjoni. Sawwathom iżjed. “Il-Knisja mhux club!”
Irrifletti
- X’post tagħti biex tħalli l-kmandamenti t’Alla jilliberawk?
iii. Raġa’ sejjaħ in-nies lejh u qalilhom: “Isimgħuni, intom ilkoll, u ifhmuni! Ma hemm xejn minn barra li meta jidħol fi bniedem itebbgħu; imma dak li joħroġ minn ġol-bniedem, dak hu li jtabba’ lill-bniedem.
Dak li jiġri fuq barra m’għandux qawwa fuq il-ġewwieni.
Imma dak li joħroġ mill-qalb għandu.
Hemm dak li jista’ jħassar ir-relazzjonijiet
b’ħarsa ta’ kilba, sfruttament, tbaħrid.
Imma fil-fond hemm xi ħaġa aktar qawwija
li ssalva r-relazzjonijiet:
il-leħen ta’ dak li jsejjaħlek lejk
li jkellem il-qalbek
li jgħinek tħares lejn l-oħrajn bl-istess ħarsa tiegħu:
ħarsa li tiżra t-tajjeb, li qatt tumilja, li tibni rispett.
Irrifletti
- X’hemm fil-qalb tiegħek? Xi tneħħi? Xi żżomm?
Nitolbu l-Missierna flimkien
Glorja lill-Missier,
u lill-Iben,
u lill-Ispirtu s-Santu,
kif kien mill-bidu,
issa u dejjem,
jibqa’ għal dejjem,
ta’ dejjem,
Ammen.
Fl-Isem tal-Missier u tal-Iben u tal-Ispirtu s-Santu
Ammen
Ħajr lil Fr Jimmy Bonnici għar-riflessjoni.