Mistoqsija
Niċċelebraw l-Evanġelju tat-18-il Ħadd – B.
Fl-isem tal-Missier u tal-Iben u tal-Ispirtu s-Santu.
Il-Mulej tahom il-qamħ mis-sema.
L-Evanġelju
Niftħu qalbna għall-Kelma t’Alla
Qari mill-Evanġelju skont San Ġwann
F’dak iż-żmien, in-nies meta ntebħu li fuq id-dgħajsa la kien hemm Ġesù u lanqas id-dixxipli tiegħu, telgħu fuq id-dgħajjes u marru lejn Kafarnahum ifittxu lil Ġesù. U meta sabuh in-naħa l-oħra tal-baħar staqsewh: “Rabbi, meta ġejt hawn?”.
Ġesù weġibhom: “Tassew tassew ngħidilkom, intom qegħdin tfittxuni mhux għax rajtu sinjali, imma għax kiltu mill-ħobż u xbajtu. Tħabtu mhux għall-ikel li jgħaddi, iżda għall-ikel li jibqa’ għall-ħajja ta’ dejjem, dak li Bin il-bniedem jagħtikom, għaliex lilu Alla l-Missier immarka bis-siġill tiegħu”.
Imbagħad staqsewh: “X’għandna nagħmlu biex nagħmlu l-opri ta’ Alla?”. Weġibhom Ġesù: “L-opra ta’ Alla hija din: li intom temmnu f’dak li huwa bagħat”.
Qalulu: “X’sinjal se tagħmel biex aħna narawh u nemmnuk? X’sejjer tagħmel? Missirijietna kielu l-manna fid-deżert, bħalma hemm miktub: ‘Tahom jieklu ħobż mis-sema’”. Weġibhom Ġesù: “Tassew tassew ngħidilkom, mhux Mosè takom il-ħobż mis-sema, iżda Missieri jagħtikom il-ħobż tassew mis-sema; għaliex il-ħobż ta’ Alla huwa dak li jinżel mis-sema u jagħti l-ħajja lid-dinja”. Qalulu huma: “Sinjur, agħtina dejjem minn dan il-ħobż”. Weġibhom Ġesù: “Jiena hu l-ħobż tal-ħajja. Min jiġi għandi ma jieħdu qatt il-ġuħ, u min jemmen fija ma jkun qatt bil-għatx!”.
(Ġw 6:24-35)
Riflessjoni u talba:
i. “Rabbi, meta ġejt hawn?”
Jagħti l-ħin biex jisma’ l-mistoqsijiet.
Jista’ jagħti risposta sempliċi, ta’ malajr:
il-ġurnata, il-ħin … u barra bid-daqq.
Imma jagħtil-ħin anke għar-risposta
għax jisma’ l-ġuħ aktar profond li forsi nsew:
il-ġuħ għall-ħajja, ħajja profonda, ħajja ta’ dejjem.
Irrifletti
- X’tip ta’ ġuħ hemm moħbi taħt it-tfittxijiet normali?
ii. “X’għandna nagħmlu biex nagħmlu l-opri ta’ Alla?”
Ħafna drabi din il-mistoqsija prinċipali li ngħix biha:
x’irrid nagħmel?
Ġesù seta’ offra lista ta’ soluzzjonijiet, azzjonijiet li rridu nagħmlu.
Risposta li tissodisfa, tagħti sigurtà:
agħmel hekk u tkun safe.
Minflok jagħżel li jibdel il-verb
bidla li timplika stil ta’ ħajja:
li temmen f’Ġesù hija l-opra ta’ Alla fik.
Mhux x’ser nagħmel biex nassigura l-approvazzjoni t’Alla,
biex nixtri l-imħabba,
iżda li nilqa’ lilu – l-imħabba t’Alla li sar bniedem –
li npoġġi s-sigurtà fiH
li ngħix miegħu, li nħallih jgħix fija,
li nħallih jagħti forma lill-ideat, emozzjonijiet, azzjonijiet tiegħi.
Irrifletti
- Xi tfisser għalik li tara s-sinjali ta’ mħabbtu?
iii. “X’sinjal se tagħmel biex aħna narawh u nemmnuk?”
Il-mistoqsija tagħna: nibqgħu nitħabtu fuq provi:
x’ser nagħmel jien
x’ser tagħmel int … biex tagħti prova tiegħek innifsek
Ir-risposta ta’ Ġesù titfagħna fuq linja differenti:
li tirrikonoxxi dak li ġej minn Alla u tħallih itik il-ħajja
… il-ġid li għamel Mosè (u tant persuni oħra) – inizjattiva t’Alla li jħares ħajti
il-preżenza ta’ Ġesù, Alla li sar bniedem, ikel li jagħti l-ħajja
il-preżenza tiegħek, f’idejn Alla, ssir ikel għal ħaddieħor.
Irrifletti
- Fejn għaraft lil Alla jmantni lil ħajtek?
Nitolbu l-Missierna flimkien
Glorja lill-Missier,
u lill-Iben,
u lill-Ispirtu s-Santu,
kif kien mill-bidu,
issa u dejjem,
jibqa’ għal dejjem,
ta’ dejjem,
Ammen.
Fl-Isem tal-Missier u tal-Iben u tal-Ispirtu s-Santu
Ammen
Ħajr lil Fr Jimmy Bonnici għar-riflessjoni.