Ħarsa.
Niċċelebraw l-Evanġelju tat-2 Ħadd matul is-Sena B
Fl-isem tal-Missier u tal-Iben u tal-Ispirtu s-Santu.
Hawn jien, Mulej, ġej nagħmel ir-rieda tiegħek
L-Evanġelju
Niftħu qalbna għall-Kelma t’Alla
Qari mill-Evanġelju skont San Ġwann
F’dak iż-żmien, Ġwanni kien hemm ma’ tnejn mid-dixxipli tiegħu. Ħares lejn Ġesù li kien għaddej minn hemm, u qal: “Araw il-Ħaruf ta’ Alla”. Iż-żewġ dixxipli semgħuh jgħid dan, u marru wara Ġesù.
Ġesù dar u rahom mexjin warajh, u qalilhom: “Xi tridu?”. Iżda huma staqsewh: “Rabbi” – li tfisser, Mgħallem – “fejn toqgħod?”. Hu weġibhom: “Ejjew u taraw”. U marru miegħu u raw fejn kien joqgħod, u dakinhar baqgħu miegħu. Kien ħabta tal-erbgħa ta’ waranofsinhar.
Wieħed mit-tnejn li semgħu x’kien qal Ġwanni u marru wara Ġesù kien Indrì, ħu Xmun Pietru. L-ewwel ma għamel mar isib lil ħuh Xmun, u qallu: “Sibna l-Messija” – li tfisser Kristu. U ħadu għand Ġesù. Ġesù ħares lejh u qallu: “Inti Xmun, bin Ġwanni. Inti tissejjaħ Kefa” – jew Pietru. (Ġw 1:35-42)
Riflessjoni u talba:
i. Ħares lejn Ġesù li kien għaddej minn hemm, u qal: “Araw il-Ħaruf ta’ Alla”. Iż-żewġ dixxipli semgħuh jgħid dan, u marru wara Ġesù.
Dik ta’ Ġwanni l-Battista
mhix ħarsa ta’ kontroll
li żżomm persuni dipendenti fuqha
iżda ħarsa li tidentifika fejn hemm il-presenza t’Alla
u tgħin il-persuni jaqbdu t-triq li fiha jsibu posthom.
Irrifletti
- Hemm xi persuni li l-ħarsa tagħhom għamlet differenza f’ħajtek?
ii. Ġesù dar u rahom mexjin warajh, u qalilhom: “Xi tridu?” Iżda huma staqsewh: “Rabbi” – li tfisser, Mgħallem – “fejn toqgħod?”. Hu weġibhom: “Ejjew u taraw”.
Quddiem il-ħarsa ta’ Ġesù
u l-mistoqsija tiegħU
“Xi tridu?”
il-bniedem jinżel fil-ġewwieni tiegħu innifsu
jagħraf ix-xewqa li jgħammar m’Alla
u jibda vjaġġ fejn
jitgħallem jagħraf fejn jgħammar Alla
u jagħżel kif jibqa’ miegħU.
Irrifletti
- Fejn skoprejt il-presenza t’Alla? Xi tfisser toqgħod miegħU?
iii. Ġesù ħares lejh u qallu: “Inti Xmun, bin Ġwanni. Inti tissejjaħ Kefa” – jew Pietru.
Ġesù jieħu l-ħin biex iħares lejn Xmun
biex imur lil hinn mill-preġudizzji fuqu
biex ma jieqafx fuq l-aġir spontanja u kultant erratiku tiegħu
iżda jieħu l-ħin biex iħares fil-fond
u jagħraf x’hemm miżrugħ fil-qalb
u jqanqal mixja lejn dak li l-persuna kapaċi tkun għall-oħrajn.
Irrifletti
- Liema ħarsa tgħin il-persuna oħra tagħraf il-valur tagħha?
Nitolbu l-Missierna flimkien
Glorja lill-Missier,
u lill-Iben,
u lill-Ispirtu s-Santu,
kif kien mill-bidu,
issa u dejjem,
jibqa’ għal dejjem,
ta’ dejjem,
Ammen.
Fl-Isem tal-Missier u tal-Iben u tal-Ispirtu s-Santu
Ammen
Ħajr lil Fr Jimmy Bonnici għar-riflessjoni.